Tímaglasið

„Tímaglasið" heitir nýútkominn hljómdiskur eftir Hrólf Jónsson sem Salka gefur út. Diskurinn geymir 11 lög og eru þau öll nema eitt eftir Hrólf sem einnig semur textana og syngur. Jón Ólafsson sér um undirleik á hljómborð og fleiri ásláttarhljóðfæri og Stefán Már Magnússon spilar á gítar, bassa, trommur og munnhörpu. Diskurinn var hljóðritaður í Eyranu snemmsumars 2010 og sá Jón Ólafsson um upptökuna og Haffi Tempó um hljóðblöndun og tónjöfnun. Ljósmyndir eru eftir Sigrúnu Ingu Hrólfsdóttur en Hildur Zoëga sá um hönnun og umbrot.

Hrólfur Jónsson starfaði lengi í Slökkviliði Reykjavíkur, síðar Slökkviliði höfuðborgarsvæðisins, sem slökkviliðsstjóri eða til ársins 2004 þegar hann hóf störf hjá Reykjavíkurborg sem sviðsstjóri Framkvæmda- og eignasviðs. Hann er menntaður byggingatæknifræðingur frá Tækniskóla Íslands, en las síðan brunaverkfræði í Lundi í Svíþjóð. S.l. vetur var Hrólfur í námsleyfi frá störfum sínum hjá Reykjavíkurborg og stundaði nám við Dansk Tekninske Universitet í Kaupmannahöfn. Hann tók aftur við sínu fyrra starfi 1. júní sl.

Hrólfur er 55 ára gamall, kvæntur Ingibjörgu Steinunni Sverrisdóttur landsbókaverði og eiga þau þrjú börn, Sigrúnu Ingu Hrólfsdóttur myndlistarkonu sem er meðlimur Gjörningaklúbbsins, Steinunni Björgu Hrólfsdóttur sem stundar nám á fatahönnun og Ragnar Jón Hrólfsson, en hann les bókmenntafræði og leikur auk þess á trommur með hljómsveitinni Swords of Chaos (en hljómsveitin er að gefa út sinn fyrsta disk 25. ágúst n.k.).

Hrólfur hefur lengi verið viðloðandi tónlist og sumir muna eftir Eldbandinu sem Hrólfur var meðlimur í ásamt fjórum slökkviliðsmönnum. Með því bandi léku einnig læknar á neyðarbíl slökkviliðsins, en þeir stoppuðu styttra við í bandinu. Hann er að mestu sjálfmenntaður í músikinni, en stundaði þó einn vetur nám við Söngskólann í Reykjavík fyrir uþb 35 árum síðan.

Þetta er frumraun hans í eigin laga- og textasmíð fyrir utan hljómdisk sem gefinn var út í fyrra af tríói Tryggva Pálssonar, en þar á Hrólfur nokkur lög við texta Tryggva.