Pólstjarnan fylgir okkur heim er magnaður ljóðaseiður um lífið, dauðann, tímann innra með okkur og veraldarundrið vonina.

Pólstjarnan fylgir okkur heim, nýjasta ljóðabók Margrétar Lóu Jónsdóttur, er komin út hjá Sölku. Margrét hlaut bókmenntaverðlaun Tómasar Guðmundssonar fyrir bókina en þau eru veitt ár hvert í minningu skáldsins Tómasar Guðmundssonar fyrir óprentað handrit að ljóðabók. Í umsögn dómnefndar segir að Pólstjarnan fylgir okkur heim sé magnaður ljóðaseiður um lífið, dauðann, tímann innra með okkur og veraldarundrið vonina.

Pólstjarnan fylgir okkur heim er fimmtánda ljóðabók Margrétar en hún hefur einnig gefið út eina skáldsögu. Margrét hefur síðustu ár fengist við skáldskap, þýðingar, kennslu og myndlist.

Umsögn dómnefndar í heild sinni:

"Ljóðmælandi situr á útikaffihúsi og hugsar um lífið og tilveruna. Minningar leita á hana; minningar um látna ástvini, ljúfsár augnablik úr æsku og ferðalög á fjarlægar slóðir. Úr þessum minningum verður til ljóðrænt vitundarstreymi sem er í senn kjarnyrt og margrætt.

Pólstjarnan fylgir okkur heim er vandað og vel uppbyggt handrit með skýrum boga. Um er að ræða samfellda frásögn sem skiptist í mörg stutt, ónefnd ljóð sem saman mynda samhljóm er minnir á sinfóníu eða óhlutbundið kvikmyndaverk. Ljóðmálið er tært og grípandi og í gegnum handritið má finna magnaðar ljóðmyndir sem sitja lengi í huga lesanda að lestri loknum.

Höfundur fetar fimlega einstigið á milli hins pólitíska og persónulega, án þess þó að vera prédikandi og þrátt fyrir að hér sé ort um flóttafólk, stríð og dauða þá liggur í gegnum handritið þráður vonar sem er ekki bara viðeigandi fyrir þá tíma sem við lifum, heldur ef til vill nauðsynlegur. Táknmynd handritsins er Pólstjarnan, leiðarstjarnan sem í aldanna rás hefur vísað mannkyninu veginn um ókunn höf og lönd.

Á sama hátt og Pólstjarnan vísaði sæförum veginn á öldum áður, vísar hún lesendum veginn í gegnum handrit sem við fyrstu sýn virðist ólínulegt en er þó jafn víðáttumikið og kunnuglegt og stjörnuhiminninn.

Pólstjarnan fylgir okkur heim er magnaður ljóðaseiður um lífið, dauðann, tímann innra með okkur og veraldarundrið vonina."

Margrét Lóa í viðtali við Bara bækur á Rás 1

Viðtal við Margréti Lóu í Morgunblaðinu

Útgefandi: SALKA

Margrét Lóa Jónsdóttir

Draumasafnarar

2,990 ISK

Pólstjarnan fylgir okkur heim

4,490 ISK 3,990 ISK