Byrgið: Sögur, kjarnyrði, brot

Byrgið geymir úrval fjölbreyttra texta sem Franz Kafka, einn áhrifamesti höfundur 20. aldar, lét eftir sig óútgefna er hann lést aðeins fertugur að aldri árið 1924. Safnið sýnir vel fjölhæfni hans og góð tök á styttri textum en hann var meðal frumkvöðla í ritun örsagna á síðustu öld.

Auk örsagna og smásagna má hér finna kjarnyrði og sögubrot, sem og tvær nóvellur þar sem óvenjulegar aðalpersónur reyna að finna sér stað í tilverunni.

Ástráður Eysteinsson og Eysteinn Þorvaldsson þýddu saman hluta þess efnis sem í bókinni er og birtust þýðingarnar upphaflega í blöðum og tímaritum. Ástráður hefur nú endurskoðað þær og þýtt til viðbótar allnokkrar sögur og kjarnyrði. Hann skrifar einnig eftirmála og gerir grein fyrir efninu og helstu einkennum á verkum Kafka.

Þetta er sjötta bókin með verkum Franz Kafka sem út kemur í þessari ritröð og allar eru þær þýddar af feðgunum Ástráði og Eysteini. Með útgáfunni má segja að allt höfundarverk Kafka liggi fyrir á íslensku.