Algjör Perla er glæný bók úr smiðju Jónínu Leósdóttur, sem hefur skrifað á þriðja tug bóka – þar á meðal tvær geysivinsælar glæpasagnaseríur kenndar við Eddu og Sáló ehf. Alþekkt kímnigáfa Jónínu nýtur sín sérstaklega vel í þessari margslungnu og hlýlegu sögu sem kemur sífellt á óvart.
Þegar Perla rankar við sér á Landspítalanum eftir heilablóðfall snýst hennar fyrsta hugsun aðeins um eitt: Bévað líkið, sem getur alveg ómögulega verið áfram þar sem það er.
En hvað getur hálflömuð manneskja á áttræðisaldri tekið til bragðs í slíkri stöðu? Vitanlega getur hún ekki blandað nokkrum í svo viðkvæmt mál. En það má komast ansi langt á þrjóskunni og hugvitinu einu saman … og stundum fær kona í neyð liðsauka úr óvæntustu átt.
✨ Umsagnir
„…þessi kímni er bara meiri háttar. Ég var mjög ánægð með þessa bók … Þetta er bara stórkostlega fyndið.“ - Ingibjörg Iða Auðunsdóttir / Kiljan
„Þetta er léttleikandi og kómískt og svo er það Perla. Þessi persónusköpun er gríðarlega vel heppnuð.“ - Kolbrún Bergþórsdóttir / Kiljan
