Fréttir

Esmeralda Santiago er frá Púertó Ríkó og er nýflutt til New York. Líf hennar utan veggja heimilisins er kærkomin hvíld frá baslinu í tveggja herbergja íbúð í Brooklyn, kröfuharðri móður og ört stækkandi systkinahópi. Töfrar og tækifæri borgarinnar heilla og Esmeröldu dreymir um að gera nokkuð sem enginn í fjölskyldu hennar hefur gert áður - að mennta sig. Hún fær inngöngu í virtan sviðslistaskóla á Manhattan, leikur Kleópötru í leiksýningum, dansar salsa um nætur og eygir von um annað líf, frægð og frama. Esmeralda aðlagast nýju umhverfi fljótt en krafan um að hún sé trú uppruna sínum er sterk og togstreitan eykst. Hún berst fyrir sjálfstæði sínu og að losna undan verndarvæng móður sinnar sem sér hættur á hverju götuhorni og í augnatilliti hvers karlmanns.

Bókin er sjálfstætt framhald Stúlkunnar frá Púertó Ríkó sem kom út 2014. Hér heldur höfundur áfram að segja þroskasögu sína og lýsa uppvexti sínum á magnaðan og seiðandi hátt.

Esmeralda Santiago deilir með okkur minningum sínum sem veita einstaka innsýn í líf ungrar konu í New York sjöunda áratugarins. Leiftrandi frásagnargáfa Esmeröldu heldur lesandanum hugföngnum. Ljóslifandi minningabók sem erfitt er að leggja frá sér og hefur hlotið einróma lof gagnrýnenda.
 
Herdís Magnea Hübner íslenskaði.

Annað land segir frá hinum fjórtán ára Aleks. Hann dvelur ásamt fjölskyldu sinni í flóttamannabúðum í smábæ í Svíþjóð. Borgarastyrjöld geisar í heimalandi þeirra og þau eiga að baki langt og hættulegt ferðalag. Smám saman kynnist Aleks nýju fólki í nýju landi.

Baráttan innra með honum gerir honum þó erfiðara fyrir að fóta sig þar. Hann þarf að takast á við erfiða reynslu, fordóma og eigin hræðslu en eygir um leið von um bjartari framtíð.

Bókin veitir lesendum innsýn í hugarheim ungs drengs sem hefur mátt þola margt á stuttri ævi en líkt og mörg ungmenni í dag hefur hann þurft að flýja áður friðsælar æskustöðvar sínar og fóta sig í nýjum heimi. Hún er vel til þess fallin að opna umræðuna um málefni flóttafólks og þær áskoranir sem það glímir við fyrir unglinga og ungmenni. Höfundur bókarinnar er Håkan Lindquist og Ingibjörg Hjartardóttir þýddi. Salka gefur út.